مراكش : الى مسيو الوالي كمل خدمتك نعامس الا ريبتو هاديك الخربة لي خارجة من السور ضروري تفتحو هذاك الممر الخاص للعموم

راكم جبدو غير الصداع لأنه لن نسكت على هذه التجاوزات ..

 سي الوالي مزيان هادشي نعامس لي درتي، وقفتي على هدم خربة خارجة  من السور بحال عنق طيبيبت.. ولو ان هاديك الخربة نعامس عمرها أعوام طويييييلة .. غير أن الزوبعة كانت في محلها وفي وقت مدروس و لكن ما كاين باس .. ندوزها بجغمة ديال الشليمان = أتاي 

و لكن أصفق لهذا العمل على أي حال من باب الحفاظ على تراث المدينة الحمراء .. 

مرسي بوكو مسيو الوالي

 ماي كويستشن سؤالي : 

 فين كنتو شحال هاذي نعامس.. حتى تحركت زوبعة خفيفة عاد تحركتو علاه معندكومش نعامس مصالح بمقر الولاية تصول و تجول لتراقب، اوا مصلحة الآثار حتى هي خارج التغطية فكرتيني نعامس اش داكشي تيبنيو قرب قصر الباهية في الطريق الى مقر الباشوية أنا عارف الملف..الخ .؟؟ .. ما عالينا.. ماكين باس نعامس .. سامحني إلا كثرت عليكم نعامس، اسي الوالي راك حلو و لطيف.
 نحن أبناء مراكش نعرف جيدا ما يجري و نحفظ تاريخ المدينة، إوا هاديك دار البارود من ذالك اليوم المشئوم التي تم هدمها، كتبت مقالة قلت أنذالك: ان ساكنة مراكش تبكي على هدم معلمة تاريخية لمدرسة عريقة.. ولم نشاهد زوبعة و لا تنديد ولا صحافة الكاغيط، ولا صحافة الصرف الصحي، ولا جمعيات المرقة والزرقة تحكرت والووووووووو .. بحال إلا هدمو حيط ديال سبيطار .. ونزيدكم نعامس إوا هاديك الطريق العمومية  لي ولات "طريق بريفي" زعما ممر خاص.. المؤدية إلى فندق " روايال ميراج " الفندق الذي تسبب في هدم مؤسسة المياه و الغابات و مسبح الكتلية..  وضحكو علينا "بعرصة مولاي عبد السلام" مراكش كولو عراصي " حدائق" والطامة الكبرى ان دار البارود  تحولت الى باركينك .. بالله عليكم ماشي حرام هادشي ..
ترى يا طويل العمر ان يوسف بن تاشفين يتقلب في قبره.. و الله أعلم.. لو كان حيا لقطف الرؤوس..

ماكين باس يكون فندق فخم فايف ستارز لوكس ولكن لاش الممر الخاص و تحويل معملة تاريخية الى مرأب بسيارات نزلاء الفندق؟؟؟.. واش فراسك اسي الوالي بهاد العملية لي درتو راكم غادي تنوضو سكاندال كبير فمراكش و سوف يطالب الناس بفتح الطريق لي سدت بسبب الفندق السالف الذكر اعلاه، وإغلاق الباركينغ..؟؟.. ثم إعادة بناء دار البارود بنفس المواصفات التي بنيت عليها. والذي روحي بيده، ستتأسف لو كنت حاضرا امسيو الوالي الظرافات، عندما كانت إدارة المياه و الغابات ومسبح الكتبية، والحديقة التي كانت تخيفنا و نحن صبيان، بفضل عدد كبير من أنواع الطيور التي انقرضت بسبب عدو الحضارة 
"الاسمنت المسلح".. خطا استراتيجي فظيع انك تحضر لهدم الخربة المعلومة، وصحافة الكاغيط 
" بحال تراكت " تكتب و جلهم لا يفكون الخط في تاريخ البهجة. لأن الناس غادي يتحركو ويجبدو ملفات سأذكرها لاحقا.. بفك العزلة عن العامة وفتج الممر الخاص، وإغلاق الباركينك النحس..الخ.
 في الدول التي تحترم تاريخها و شعوبها  تكن كل "التقديس" لمآثرها لأن التاريخ  يمثل حضارة. حنا ليست لنا  ثقافة الحفاظ على مآثرنا التاريخية، والعيب ماشي عليك امسيو الوالي .. كلا يا ابن الحلال.. وهذا من باب الإنصاف.. لأنك لست من أبناء المدينة ولست منتخبا، ولكن العيب على المنتخبين لي دمرو تاريخ وحضارة مدينة عالمية مدينة يوسف بن تاشفين ..  

 اسي الوالي مع كل الاحترام لشخصك الكريم، مراكش خصها والي ولد مراكش، عندو غيرة على البهجة، مدينة الأولياء.. المدينة التي صار لها صيت عالمي من حيث تاريخها المجيد، و تم تنقيط ساحة جامع الفنا ثرات عالميا..  و دابا نعامس و لات الساحة " سوق " المأكولات ها الراص مفور، ها لغدايد الكحلة .. من ساحة الفرجة إلى ساحة عمر كرشك و زيد ..

دون يا قلم ها المخالفات شي نماذج : 

هاداك البالكون لي خارج من  سوليما مبروكة ماشي شوهة بكل المقاييس، و كتبت عليه أكثر من عامين، ولكن صحافة  المرقة مصيبة ديال مراكش، إلا من اخذ الله بيده .. و المجتمع المدني الغالب الله .. كاينين ناس خدامين " صحافة و مجتمع مدني"  بغيرة و وطنية وهم قلة.. دوماج .. وكايننن الشلاهبية و ما أكثرهم تريكت  لمرايقية " مفرد مرايقي" .. و نزيدك نعاس شحال تكلمت على هاديك لفضيحة ديال المركب التجاري المقابل لسور باب غمات .. سير ريبو نعامس هاداك المركب لأنه قرب السور، والبناء قرب أسوار المدينة ممنوع. للأسف ليس هناك منبر واحد أو جمعية، تكلمت على هاديك المصيبة العظمى، ولا  حتى الجمعيات الذين يدعون الحفاظ على المال العام، واعرفهم جيدا واعرف كل شيئ عن اصحاب هذه الجعيات ..
والووو.. غير زريعت الحنك .. اللهم جريدة الأسبوع التي تطرقت للملف بعد رسالة وجهتها أنذالك إلى مدير الأسبوعية. مولاي مصطفى العلوي، فتطرق للموضوع مشكورا..الخ . وبعد نشر الجريدة للملف تحركت جمعية حقوقية من الرباط لتسجل دعوى لان مشروع مدام المنصوري رفضه حصاد و وافق عليه بيكرات .. ولكن الملف يعلم الله فين وصل ؟؟.. 
أويلي غدايدي.. كون غير عندي شي حناك " خدود" نصرفقهم، ولكن الغالب الله.. مراكش ميت، و حشومة و عار تجي جريدة و جمعية حقوقية من الرباط لتدافع عن حقوقينا ..  فين أيامك اسي البصري ؟؟

 جمعيات و صحافة مراكش في غرفة الإنعاش .. الا من أخذ الله بيده .... حتى هاديك الجمعية لي حركت ملف تجاوزات المجلس الجماعي بخصوص مشاريع خاصة بكوب 22 كلها تصفية حسابات ليس إلا .. لان الجمعية دارت ندوة أكثر من عامين " بفندق بتاركة"  وطرحت عليهم السؤال بخصوص المركب التجاري باب غمات و لكن بالزربة سرباوني، بجواب لا علاقة له بالسؤال، ثم انصرفت .. لأنه ليس من طبعي نضيع وقتي في التفاهات ونشارك في السوليما الكارتونية.. لأنه مبتش نحرق أعصابي على الخاوي .. و بيت نحافظ على شعوري النبيل و مشاعري و أحاسيسي الرهيفة .. أبشاااخخ.. سيادي و البهجة هاذي .. 

مستملحات كوحلالية من أجل استراحة خفيفة :

هاكااااك .. الرضا .. أحنيني .. أرى داك الراص نبوسو ..

اشنو .. سير  بوس حيط الكتبية .. نعامس..

الله يرضى عليك يا كوحلال  يا ابن الحلال يا ولدي ..

مرسي بوكو اعمي شرب  أتاي ها الفقاس جاي..

الله يرحم يوسف بن تاشفين،  فلو كان يعلم ان مراكش سوف يصبح حالها على هذا الشكل الزفت، لكانت مراكش الآن هي  " جمعة غمات حاليا" التي انطلق منها تصميم مشروع المدينة الحمراء ..

 الله يدير شي تاويل الخير .. و الله يرحم أيام سي بلماحي، ومصطفى طارق ..

 مشاو السبوعا ..  سير على الله .. يتبع ج2