مراكش: المسيرة تحرير الملك العمومي فيه و فيه بلا ما تغلطو الناس ..

قرب مشروع القنطرة بالمسيرة أ المشروع لي مازال ما بغى يحن عليه الله يكمل، حيث كل مشاريع مراكش على عهد مسيو بيكرات  تعرف تعثرا كبيرا.

عرصة البيلك .. ساحة لالة رقية .. و القنطرة لي طولت،و معرفتش اشنو كا يتسنى  مسيو الوالي لي ما يسرع هاد المشاريع  بصفته صاحب السلطة الوصية ؟.. نهار طاحت شويكوك ديال الشتا بان عيب القنطرة و هي في بداية الإصلاح ..

 أما في ما يخص تحرير الملك العمومي، غير نقصو علنيا شوية من القاذفات السريعة قرب القنطرة كاين إشارة ضوئية ثم حديقة عمومية طويلة غاديا حتى لمسجد العنبر ..

 اوا نخليكم غير عند إشارة المرور ، قرب القنطرة سيرو شوفو مول القهوة لي حط كولوميط ديال الكراسي و الطاولات ، وسط الحديقة .. هادشي بعد صلاة العشاء بشي نصف ساعة تقريبا ، ناس دايزين مع وليداتهم و نسوانهم،  و شي وحدين فالتين ليهم عينيهم. و لأول مرة أشاهد  هذا التعسف الواضح في حق الملك العام، و أيضا العامة ..

 حقيقة يشهد علي الله ، أنني  نسيت  الموضوع حتى وجدت خبرا على الفيسبوك .. يتعلق بتحرير الملك العمومي بالمسيرة جوج أو حتى خمسين ماشي مشكل ..

يطبق القانون على الجميع و لا حبسو علينا هاد الاسطوانة ديال تحرير الملك العمومي، لأنها ليست عادلة شي عليه القانون،  وشي دايز من حداه ..

الدرويش تحكرو عليه ....الخ.

 نرجع لهاديك المقهى التحفة أي و الله ..

السرباي = النادل، الزغبي بالبلاطو يقطع الشانطي، و لا حافظ مسكين انت بغا يشعل انتا بغا يطفى ..

 اوا الكعدة مبرعة لوززززززززززز ..

 الزبون بحال إلا مقهوي فاوطيل المامونية ها النوار ها الكهرباء العمومية ها الهواء .. ها الناس دايزين يشوف مع راصو يخضر عويناتو ..

 اوا بزااااااااااااااااف هادشي ..

 أش من تحرير الملك العمومي؟ نقصو علينا ..  و بردو علينا الطرح شوية ..

واتقوا الله في أنفسكم و في غيركم ..

و الله العظيم هاد المرة  إلا غادي نبدا نصور غير بالأدب و نفضحكم  في الفيسبوك ..

  راه نازلين غير على صحاب العربات و الفراشة مساكن .. ما عندهم جهد .. و لا جهد إلا جهد الله ..

 أما صحاب لقهاوي و صحاب المأكولات الخفيفة بعضهم وليس كلهم " طبعا "  مخرجين الكراسي جنب التريتوار .. ما هضر معاهم حد ..

هادوك ما محتلينش الملك العمومي ؟ .. الفوضى و الروينة ..

واخا سيرو شوفو الاحباس بالمسيرة أ  ..

زعما تجريو على الفراشة لأنهم تا يخليو الازبال، اوا  الشركات الأجنبية واحدة فالمدينة، و الأخرى في حي جليز، شافطين  الملايييييييييييييييييييين من الدراهم ..

  اشنو دورهم إلا ما جمعو الأزبال ، بيتوهم  يجمعو زريعت الحنك .. ؟

آخر تويشية :

خلف  المسجد الكبير لحي المسيرة أ المجاور لملحقة الحي الحسني، سيرو شوفو  صاحب مقهى مخرج الكراسي في ساحة هي ملك عام ..

  نقصو علينا شوية .. ريحت الشياط كسرتنا ..

حتى  أنا غادي ندير تحرير الملك العمومي بعدسة الهاتف ..  يتبع سير على الله