شباب المغرب ساخط على السياسة و السياسيين ، و هضرت الزناقي و لحلاقي و حشيان الهضرة سمعناها في البرلمان

تويشية كوحلالية

نرجع معاكم لحقبة الملك الحسن، عندما كان البرلمان يغلي بمعارضة قوية كانت جلها من الاتحاد الاشتراكي و منظمة العمل الديمقراطي الشعبي، يقودها أستاذنا في النضال و معلمنا "سعيد ايت ايدر" و كنت من اطفال المنظمة، وتعلمت ما معنى اليسار، و النضال، وخلينا من هاد يسار او يمين يسار ديال دابا.

 هذا مجرد يسار ستة كاو كاو .

قلت أيام عز السياسة و النضال و المواطنة و البرلمان الحقيقي، مشات بلا رجعة، و لا وجه للمقارنة مع برلمان ديال أوجوردوي  كان الاتحادي الشرس فتح الله اوعلو، اخطر برلماني وكنت احترمه، اما الان فانه لايساوي عندي حتى ريال مثوب. 

قلت: كان لعلو واعر من خلال مداخلته، كان كا يبهدل حكومة أحزاب كوكت مينوت لي خلقها إدريس البصري، و مرة رفع لعلو حدائه  ساخط .. مشهد لن انساها ...تهز البرلمان من خلال الحيحة لرجال اقول: رجال المعراضة.

سؤال لوزززززز

واش " حزب الاصالة و المعاصرة " يعتبر من المعارضة؟ 

الله يهديكم و اش الحزب لي جابو مستشار الملك الهمة، يعتبر حزب، راه فقط  نسخة من حزب الفيديك الذي أسسه مستشارالمملك الحسن، اعتقد انه رضا كديرة .. 

التاريخ يعيد  نفسه مع اختلاق في الاسماء وتشابه في الظروف السياسية ليس الا..

زمان غير بعيد ، في المغرب كانو ناس فعلا سياسيين مناضلين من الطراز العالي، و في ذلك  الوقت طالبت المعارضة حينها بملتمس الرقابة = الإطاحة بالحكومة الأمر الذي دفع الملك الحسن إلى استقبال المعارضة وكانت جلها من لاتحاديين، وبرد السوق لأنه كان يخشى الاتحاديين و اليساريين بزاففففففففففف ، لأنهم كانوا فعلا اتحاديين و يساريين، ما شي بحال هادو ديال دابا.

  دابا ما بقات لا معارضة لا سيدي زكري خو سيدي شكري، مانتونو = الآن بحال الاشتراكي بحال الليبرالي، بحال الإسلامي، بحال الشيوعي ، سلة واحدة كولشي مكفح و المسرحية دايزة على الشعب، و الدليل ها هي حكومة بنيكران المبوصة، فيه تلاميذ علي يعتة مع تلاميذ الدكتور الخطيب رحمه الله ...

 اعباد الله واش لعكر و لخنونة يتكدو؟

أوهووووووووووو

واش لعسل حر،  بحال غاسول عروسة ؟

لواههههههههههه

بلا لف ولا دوران الله يعطيني لعمى أنا ما بيت ، لا انتخابات لا برلمان لا وزارة، الله يطليهم بها من الراص حتى للرجلين، ويعطيهم الضرابي فالركابي ، و حتى الدنيا بورموا= بالنسبة لي
جمافوووووووو فيها ...

 أنا غير مخيم  فالدنيا ،قدري من قدركم، و اجبي أمام الله، نكتب و نفيق الغافل، و نفهم السطل.  بالفيريتي عمة  التيريتي.  لو كانت فعلا عندنا معارضة كما كانت من ذي قبل.
 بوركوا ما ترفعش المعارضة إلى الملك ملتمس بإسقاط الحكومة.

وااااا الخوت حنا غير قشور الحوت... حتى الحوت فينا هو لقيناه؟ السردين والشرن و الثمن هز 
و لا حط ...
"شري تندغ كري تبات " حكمة لاحد حكماء الموزمبيق

 قلت يا جماعة الخير: 
راه غير كا يمثلو علينا، لا معارضة لا أغلبية راه غير مسرحية، اليوم معارضة و غدا أغلبية.

 علاه نسيتو " حزب العدالة والتنمية " شحال كان محيح في المعارضة، اوا ها نتوما شفتو دابا وصلو الحكم، قهرونا بالزيادة، والشعب تايغوت، حديت واحد في الشارع المراكشي .

المعيشة غلات و كولشي غلا ، راه إلا ناض فالمغرب، والله لا وقفت واخا تجيبو ليهم مارينز الموزمبيق ... 
هادو لي غادي ينوضو، ماشي عشرين فبراير المسيسة، هادو غير ولاد باب الله، حزقستان و ساكون اول من يقود هذه الانتفاضة المباركة، كما نوضها فسيدي يوسف بن علي على غلاء الما و الكهرباء.
 ردو البال كلمتي مسموعة فمراكش اكثر ما هي مسموعة عند رجال السلطة ..

اوا ما شكماني فيكم خليو الفراشة يترزقو على الله امام المساجد، والا سيكون أول من يتلقى  
بارود قلمي هو مسو الوالي..
لانني تقلقت بزاف عند دخولي المسجد يوم امس لصلاة العشاء بجامع الحس  الحسني الكبير القريب من المقاطعة ، ولقيت الفراشة الزغابة جامعين سلعتهم و المخازنية واقفين عليهم، زعما ممنوع يحط شي قندوح اوا باش غادي يعيشو هاد الدرويش.
انا ما عندي ما نخسر بحال الحبس بحال الخربة شدك الخبز فدار الواليدة بحال بوغماغام = الحبس ..
 انا غير بيطالي و مزلوط وافتخر ... 
راه نشعلها فمراكش امسيو الوالي الا باقي منعتو الفراشة من خبز ولادهم امام المساجد فقط، غير هذا انا معاكم في تحرير الملك العمومي. اوا الله يرضي عليك اسي بيكرات لا تخليني نعاود التجربة لي دازت مع الدكتور سي محمد فوزي.. فسيدي يوسف بن علي.. 
راه معرفتش لبارح واش صليت بوضوء او العكس، لأنني  احسست بمرارة، و انقباض شديد في القلب، حسيت بالحكرة، اكثر ما حسو بها الفراشة الغلابة.

 اوااا هادشي راه بزاف، وامام  بيت الله تمنعو المسلمين من رزقهم

اللهم قطع الرقاب و لا قطع الأرزاق..

شوفو ليهم شي بديل،  او جمعهوم في مكان معين او سوق ، و قبل تحرير الملك العمومي مفروض ديرو احصاء للفراشة ، و من بعد وفرو  ليهم حل ولو مؤقت.

اما نوض جمع حيد ... 
واهههههههه واش حنا في عهد الباشا لكلاوي؟
حتى الناس يزيدو يكرهو لبلاد ، عاد بيتهم يتسجلو في اللوائح ؟
أنمممممممممممممم ...معناه هي النممممممممممممم

نعم حنا مع تحرير الملك العمومي، و لكن خليو الناس تمعش، أمام المساجد ساعات قليلة و البيع راه عيان زفت،كما صرح لي البارحة واحد الدرويش عندو اسرة بلا شك راه كاينين ناس عندهم اسر خصهم لحليب لو ليدات ..

اللهم اني بلغت .. اللهم اشهد ...
راه نتوما بسياسة الزمر ديالكم لي كا تساعدو هاد الشباب  يصبحو داعوشيين ..

الناس راه تقهرو الزلط و الفقر والبطالة و المعيشة درت جنحين ..

خرجت من المسجد و عيني غرغرو ليا بالدموع ، بقاو فيا هادوك الناس بعيون جاحظة  و الحسرة بادية على محياهم ، و لا حول و لا قوة الا بالله ..

 الانسان يقتل من اجل عرضو، او رزق ولادو ..

  تفركع يا الشعب، راه السياسيين فالمغرب دارونا غير مطية = طريق يدوزو على ظهرنا إلى الكراسي.

الصورة من الفيسبوك 

شباب الفيسبوك ساخط على السياسة و الحكومة وحتى البرلمان، لي ولات هضرت جامع الفنا تروج تحت قبته ، و من عند رئيس حكومة؟ 

طزززززززززززز بفتح الطاء   

الى اللقاء

"""""                

ننشر ما لا يقدر الآخرون على نشره، نبث ما لا يستطيع الآخرون بثه لأننا نخاف الله، و ننبذ  الظلم و نعيد الحق للمقهور، وهذا هو هدف رسالتنا، نحن مظلة لمن احرقه حر الظلم.

 مهما كنت "مثاليا" ستجد من يكرهك ! حتى الملائكة تكرهها الشياطين

’’مراكش تايمز’’ منبر لمن لا منبر له, و صوت لمن لا صوت له, و ظل لمن لا ظل له, موقع الدراويش و الله الموفق و السلام عليكم.

ذ محمد كوحلال كاتب مدون ناشط حقوقي مستقل مراكش المملكة المغربية

للاتصال :                      

Khllmed80@gmail.com