مراكش: إلى مسيو حصاد هذا ما يجري بتراب نفوذ مقاطعة الحي الحسني.

اسي حصاد جيبو لينا شي والي لمراكش،وبدلو قايد مقاطعة الحي الحسني.هادشي راه بزاف..

لا حظنا قيام قائد الملحقة الإدارية بمقاطعة "الحي الحسني" بحملة ضد أرباب العربات المجرورة بكل "سويقات المسيرة أ" حقيقة ان بعض و ليس كل من هؤلاء الدراويش يتسببون في زحمة السير،وعرقلة المرور و لكن الحل ماشي هو نقطعو ليهم رزقهم،و يقال:

"قطع الأرقاب و لا قطع الأرزاق". الغريب لي ما فهمتش هو ان القايد فقط طبق القانون على هؤلاء الدراويش. بمعنى أوضح حكرهم وها هو الدليل على حكرة قايد" الحي الحسني" على الدراويش. البارح "بالأحباس" كانت زحمة كما هي العادة،ولاحظت ان عددا من أرباب المحلات صحاب رأس المال بالملاييييين، يضعون بعض السلع أمام المحلات ليس لغرض العرض،بل لعدم ترك مساحة "للفراشة" و التضييق عليهم . اوا هاد "الفراشة" أش غادي يديرو يمشي يكريسو، اش غادي يوكلو ولادهم لحجر؟...الخ. دابا أمسيو القايد القانون طبقتيه غير على الدراويش؟،علاش ما تمشي تشوف بعينيك أش دايرين بعض وليس كل أرباب المحلات "بالأحباس" من احتلال فاضح مفضح للملك العام باش يجريو على " الفراشة"غير بالأدب. في حين آخرون تركوا أمام محلاتهم الفضاء خاليا باش يتمعش الفراش. ومني لهم كل الشكر والتقدير.  نزيدك أسي القايد والكلام أيضا موجه إلى مسيو المينستر = الوزير حصاد، باش يعرف أش واقع؟. لان التقارير الصحيحة لا تصل بل المغلوطة هي التي تصل عبر الفاكس. قلت شحال من مرة تكلمت على مقاهي عند مفترق الطرق " مكان القنطرة سابقا"حيث هناك أصحاب مقاهي وضعوا الطاولات والكراسي، لزبنائهم بلا حشمة بلا حيا، في قلب الحديقة المؤدية إلى "جامع العنبر" مع ان المكان هو فضاء بيئي و متنفس للدراويش،و النسوة مع صغارهن هن الاكثر عددا،والحديقة تعتبر ملك عام. ماشي يجي يحط فيه شي مول القهوة الشليات و الطبالي. زعما أمسيو القايد، علاش ماطبقتي القانون على هادو، أقصد  أرباب بعض المحلات "بالأحباس" والمقاهي. دابا المسكين طبقتي عليه القانون، و العفريت مول لفلوس هانية على وزن زاكية. اوا دابا تخيلو شي مواطن ضهصيص= قليل النظر، جنابنا الموقر نموذجا، أتنزه ليلا وسط الحديقة لغرض نشم شويكوك ديال الهواء النقي، حتى ندخل فشي طبلة ويجبدو ليا شقوف الكيسان، وشي غلاقة براد من كمارتي أو زنافري،أوربما أعانق بحرارة شي شجرة، يكلكموني بالكبص. 
اسي القايد، راه ماشي معقول هادشي لي كا دير، لأنني اسمي هذا" شطط في استعمال السلطة" نعامس. طبق القانون على الجميع و لا هز يديك. حنا مع القانون،والقانون يسري على الجميع،ونحن سواسية وهذا ما نص عليه الدستور. ومن باب الانصاف أقول:
الحملة التي قادها قايد" ازيكي سكوما" لتنطيف حنبات "سوق دوار ازيكي"من الفوضى، استحسنها المواطن،وكنت حاضرا، وأقول للقايد: برافو عليك.
أمر آخر جيد جدا قام به قايد حي "المسيرة 2 "حيث قضى كليا على الفوضى ديال شي فوضويين جارين العربات،وسخو الدنيا قرب "جامع العنبر"،ودايرين عرقلة المرور.
أنا أعطي نماذج للسادة القياد لي خدامين ويطبقون القانون بسلاسة وبذكاء ولكن لا استثناء.هذا هو السربيس، اسي حصاد. 
تحية تقدير لكل رجال السلطة اللوززز بمراكش. يتبع الى اللقاء