إلى السيد الحموشي لله درك يا ابن الحلال عيب عليك أن تحطم قلوب وليدات الشعب

ذ محمد كوحلال ولد الشعب

جاء في منشوركم ان إدارة الأمن ألزمت  المرشحين " ات" بشرط السن وهو 21 ربيعا أي مواليد 1995 و لكن لم تحددوا السن بالإشارة إلى يوم الازدياد. بمعنى ان المرشح يجب أن يكون قد استكمل 21 عاما بالتمام و الكمال، وخليتو الشرط مفتوح مبهم غامض، و بالتالي نعتبره حكرة لولاد  الشعب شباب و شابات ..

 حسب شكاية وصلتني صباح اليوم  لأب فقير مقهور عايش فدار لكرا= الكراء ولد باب الله، لا رزق وفير، فقط  البركة اليومية باش معيش وليداتو، وستر مولانا الكريم .. .

و ماااااااا أكثرهم دراويش بمراكش و المغرب عامة، عايشين  مقهورين وصابرين مع العيشة الناحية.أملهم وحلمهم يكون احد وليداتهم موظف ينقذ نفسه من مخالب المستقبل المجهول، الذي صار يؤرق جيل اليوم.

 زمان اسي الحموشي كان  الاختيار في اجتياز مبارتين أو أكثر، و اختار ليعجبك كنا مفشين حينها. أما اليوم لم يعد الاختيار متوفرا كانت المباريات كثيرة، أما اليوم للأسف اختلف الأمر.

 مبارة اجتياز امتحان للالتحاق بالقوات المساعدة بإقليم الحوز، كان قوم رب العالمين من الشباب من كل مناطق الجهة،ومنهم شباب مستواهم جامعي.

 مبارة الدرك  قوم رب العالمين..القوات المسلحة الملكية بمقر الحامية العسكرية جليز قوم رب العالمين..أي مبارة ولاد عباد الله يركضون بسرعة البرق،وعند متم السابعة صباحا وليدات عباد الله كا يتكردو بالبرد باش يدفعو الملف. المهم إنقاذهم من الضياع والمستقبل الغير المضون

أش وقع لبارح بمصلحة باب دكالة التي تتسلم طلبات المرشحين و المرشحات دراري و بنات جاو مع 7 صباحا و البرد قارص فمراكش حتى التاسعة صباحا احد المسئولين عزل  مواليد 1995 من الجنسين وابلغهم ان لي مزيود قبل 21 ماي الله يهنيه يرجع العام الجاي..؟.زعما يكون مكمل 21 عاما بالتمام و الكمال ..

اوا سير كول هاداك الملف و لا لوح راصك فواد اسيل ... يعني ولاد الشعب ماعندهم حتى اعتبار و لا قيمة والوووووووووووووووو ...

اعباد الله اش هاد لبلاد؟ ..

 يعني ببساطة و سهولة ... سير حتى العام الجاي .. اكرر من باب الفقسة و لغدايد ..

 هاد الشرط العجيب الغريب امسيو الحموشي، مجحف و قاسي و ظالم  لقد ساهمتم بميزة حسن جدا برفع مؤشر اليأس المتراكم أصلا عند ولاد الشعب. أما ولادكم فأمرهم محسوم مند ولادتهم  اللهم لاحسد ..  الله يزيدكم ما حسدناكم ..

  أنا ما فراصي واش كاين شي امتحان ديال البوليس، لأني غير متابع للإعلام المحلي .. 

ومفهمتش و طبقة من دماغي سوف تطير على هاد الشرط ديال السي الحموشي، يشهد علي الله .. عقلي غادي يتصوطا = يهرب ليا لفريخ ..

 علاش درتي اسي الحموشي العقدة فالمنشار،والعصا فالرويضة؟.

 أشنو المشكل إلا المرشح مزيود في شهر غشت أو حتى ديسمبر المهم من مواليد 1995 كاينين بنات و شباب بكاو من  هاديك  الحكرة، لبارح بعد خروجهم من المصلحة بباب دكالة،   الأم عندما تعلم  بخبر ان البنت تم رفض طلبها، ربما بالفقسة الزغبية  تجيها محسوبت الشهر= دم الحيض. هادي البنت ..

أما الولد الا كان شي عيشوري = عصبي يقدر يفرشخ أواني المنزل بسبب الميمون و السعد لمبوكر ..

سؤال:تخيل حالة الأم مسيو الحموشي وهي  تضع كفها على خديها متحسرة،راه الكبدة ديال لميمة.

سؤال اخر:تخيل معي ماذا ستكون دعوات الأمهات، وهن يبصرن فلذات أكبادهن مفقسين و يائسين،وقلوبهم محطمة بحال الما البارد الا حطيتيه على شي حد راصو سخون ..

دعوة المقهور صعيبة و مستجابة ..

 الدراري مصدعين واليدهم ارى ليا  نجمع الملف، و من بعد سير حتى العام الجاي..

عيب  عليك اسي الحموشي راه عندك وليداتك الله يخليهم ليك،وعارف الكبدة ديال الأب والأم بسبب الحسرة على وليداتهم .. كتعرف اسي عبد اللطيف الظرافات، انه ولاد الشعب الدراويش هوما  لي كا يتهافتو على هاد المباريات،والغالب الله ليس لأولياء أمورهم القدرة على تمويل  متابعة دراسة أبنائهم  في كندا آو لندن بحال ولاد السياسيين و المسئولين لكبار ...

 مفروض تعطي مثال انك حريص على ولاد الشعب لي ما مكملش 21 عام يكملها عندكم بالمعهد الملكي للشرطة بالقنيطرة. و منين يدوز لا فيزيت = الفحص الطبي و يترفض بسبب نقص النظر، آو لمشك فلعينين، او لمعش فلوذنين...الخ حينها سوف يوكل المرشح الغلبان امره إلى ربه، و ليس للإدارة انك تتحمل وزر ناس ما عندهم غير الله ...

ان سولت هاد الصباح و من مصدر  موتوووووووق ان هاد التوشية خرجت من المكتب عندك اسي الحموشي،وأنا لي كنفتخر بك كرجل امن و استخبارات من طراز دولي،ولكن حطمتي قلبي و صدمتني  يشهد عليا الله..ان الشهية فرتحت ليا ما قدرت ندجدغ = ناكل حتى عمارة ديال الخبر.اقسم بالله رب العالمين  إلا حطمتي قلوب و أحلام وليدات و بنات صغار رجاهم فالله ..

 ععلاااااااش؟ لان المرشحة التي اتحدث عنها بلسان آبيها  من مواليد 25 ماي..

 اعباااااااااااااد اللللللللللله .. يشهد عليا الله و أحاسب على كل حرف يوم الحشر انه لبارح لقيت بالصدفة صديق طالب السنة الثانية بكلية الحقوق،واخبرني انه سوف يدفع الملف لاجتياز المبارة فاندهشت للأمر مخاطبا إياه :

الم يكن حلمك الالتحاق بالأكاديمية العسكرية الملكية بمكناس ؟

فكان رده صادما :

الله يهديك يا أستاذ حتى حاجة ما مضمونة فهاد لبلاد، نجربو حضنا مجبش الله، نتسانو حتى يبان شي  كونكور واخا حتى الوظيفة العمومية ...

 شوف معايا مسيو الحموشي اليأس لي وصل ليه شبانا، للأسف إنكم كمسؤولين ماعيشينش معنا، انتم بأعلى الجبل و شعب حزقستان على حاشية الجبل...هاد ولاد اليوم ماشي حلممهم يكون بوليسي او موظف، حلم وحيد أوحد ألا وهو، يخدم و يعاون دارهم  فقط لا غير ..

ولاد اليوم مستعدين يدوزو أي مبارة إنشاء الله  تكون حتى بمصلحة سلامة البطيخ بكوكب المريخ ... الشباب  اليوم مقهور مقهقر وأسرهم مغلوبة على أمرها ماديا و لي خص كملو لينا  بنكيران بارتفاع القوت. كل شاب و شابة  منى عينو يخدم أي خدمة، المهم مع الدولة، لأن الخدمة مضمونة، و يرد لوالديه شويكوك. ولكن حتى حاجة ما مضمونة فهاد لبلاد، قرا حتى تاخذ الماستر آو الدكتوراه، و سير دوز مبارة عتق راصك قبل ما يفوت لفوت ...

 الله يرضي عليك اسي الحموشي و يمتعك برضا الله و يصلح أمورك و أمور وليداتك، ويغطيك بستر مولانا هو لي ينفعك، الدنيا حدها هنا نعامس ..إلا ما صلحو هاد الخطأ اقصد هاديك التويشية ، و كلنا خطاءون من خلال تمديد الأجل، و ديرو شي إعلان بان الإدارة ألغت شرط المحدد في استكمال 21 عاما كاملا.لي مزيود فعام  1995 يجي يدفع الضوصي و ما تحرم رزق حد، الله يفتح عليك قبل ما يشركو الدراري لكواغط بلفقسة.

 و ما فيها باس تمديد الأجل بالنسبة لي بغا يعاود الملف من جديد، لأنه ربما و الله أعلم يكون عدد  من الدراري لاحو لوراق فالمجمر فاش كا طيب الحاجة لحريرة ديال الصباح لحاج ...

دير هاد الحسنة اسي عبد اللطيف راه ربي غادي يجازيك في عملك، و اهلك، وليداتك الله يحفظهم و يحفظ أبناء المسلمين بهذه الديار المغربية العلوية الشريفة المباركة ...

إشارة لابد منها من مبادئي الراسخة سواء فعلتم آم لم تفعلوا، فإنني لن أعود للموضوع لأني ربحت أجرا من خلال النشر و هذا هو المقصود وهو الأجر "طبعا "، فليس من طبعي التباهي بأنني  فعلت شيء هو من صميم واجبي و أمانة على رقبتي أمام الله ..

 لا حول و لا قوة إلا بالله ..  حياكم الله ..